اردو ادب کی تاریخ میں آنند نرائن ملا کا نام اس روشن مینار کی طرح ہے جو مشترکہ تہذیبی شعور، لسانی وابستگی اور فکری بصیرت کی علامت بن کر ہمیشہ تاباں رہے گا۔ ان کی زندگی اور شخصیت محض ایک شاعر یا قانون دان کی نہیں بل کہ ایک ایسے دانش ور کی تھی جس نے اردو کو اپنے وجود کا لازمی حصہ سمجھا۔ ان کا یہ مشہور جملہ “میں اپنا مذہب چھوڑ سکتا ہوں لیکن اردو کو نہیں چھوڑ سکتا” دراصل ان کی تہذیبی وفاداری، زبان سے عشق اور فکری وسعت کا نچوڑ ہے۔

آنند نرائن ملا ۱۹۰۱ءمیں لکھنؤ کے ایک معزز کشمیری برہمن گھرانے میں پیدا ہوئے۔ ان کے والد جسٹس جگت نرائن ملا لکھنؤ کے ممتاز وکیل اور بااثر سماجی شخصیت تھے۔ علمی و ادبی ماحول نے آنند نرائن کے فکری خدوخال کو گہری بصیرت عطا کی۔ گھر میں اردو، فارسی اور انگریزی تینوں زبانوں کا چلن تھا، جس نے ان کے ذوقِ لسانیات کو جِلا بخشی۔ ان کی ابتدائی تعلیم فرنگی محل میں ہوئی جہاں برکت اللہ رضا فرنگی محلی جیسے استاد نے ان کی ذہنی تربیت کی۔ ۱۹۲۱ءمیں انھوں نے کیننگ کالج سے بی اے اور ۱۹۲۳ءمیں لکھنؤ یونیورسٹی سے ایم اے کیا، اس کے بعد وکالت کے پیشے سے وابستہ ہو گئے۔

ملا نے وکالت کے میدان میں غیر معمولی لیاقت کا مظاہرہ کیا۔ ان کی ذہانت، توازنِ فکر اور انصاف پسندی نے انھیں ممتاز مقام عطا کیا۔ ۱۹۵۴ءمیں وہ الہ آباد ہائی کورٹ کے جج مقرر ہوئے۔ عدالتی فیصلوں میں انسانی اقدار کے احترام نے ان کے فیصلوں کو اخلاقی وقار دیا۔ ان کی وہ تاریخی رائے”میں نے بہت سے ڈاکو دیکھے، مگر ہندوستانی پولیس سے بڑا ڈاکو کوئی نہیں”نہ صرف ان کے حوصلے کی علامت ہے بل کہ سماجی نظام پر ایک تنقیدی تبصرہ بھی۔ ۱۹۶۱ءمیں سبکدوشی کے بعد انھوں نے سیاست میں قدم رکھا، ۱۹۶۸ءمیں لوک سبھا کے رکن منتخب ہوئے اور بعد ازاں دو مرتبہ راجیہ سبھا کے رکن رہے۔

آنند نرائن ملا کی ادبی زندگی کا آغاز انگریزی شاعری سے ہوا۔ انگریزی ادب کے طالب علم ہونے کے باعث ان پر مغربی فکر و فلسفہ کا اثر تھا۔ تاہم لکھنؤ کے شعری ماحول نے انہیں اردو کی طرف مائل کیا۔ ابتدا میں غالب اور اقبال کے فارسی کلام کا ترجمہ کیا، پھر اردو شاعری میں قدم رکھا۔ ۱۹۲۵ءمیں ان کی پہلی اردو نظم شائع ہوئی اور وہ فوراً اہلِ نظر کی توجہ کا مرکز بن گئے۔ترجمے کے بارے میں انھوں نے لکھا ہے

کالج کے اندر انگریزی میں کچھ کچھ  نظم کرنے کی عادت ہو گئی  چناں چہ میر انیس کی چند رباعیوں کا  انگریزی زبان  میں ترجمہ کیا ،جو پسندیدگی کی نظر سے دیکھا گیا ۔۔۔۔۔۱۹۲۷ء میں صحت خراب ہوگئی  ڈاکٹروں نے مشورہ  دیا کہ بستر پر لیٹا  رہنا ہے  پڑے پڑے دل  گھبرایا کرتا تھا۔ اس لیے کتابیں دیکھا کرتا تھا اس زمانے میں  علامہ اقبال کا ایک مجموعہ پیام مشرق میں طبع  ہوا تھا۔ اس کی ایک نظم لالہ طور کا ترجمہ انگریزی میں لیٹے لیٹے  کر ڈالا جو حلقہ احباب میں پسندیدگی کی نظر سے دیکھا  گیا(۱)اوراق گل،مرتبہ احمد ہاشمی ،ایچ آر خاں رام پور اسٹیٹ ،۱۹۴۴ء،ص ۳۲۲
ان کی شاعری میں فکری گہرائی، حب الوطنی، انسان دوستی، اخلاقی بصیرت اور تہذیبی ہم آہنگی نمایاں ہے۔ اقبال سے متاثر ہو کر انھوں نے شاعری کو محض جذباتی اظہار نہیں بل کہ فکری اور اصلاحی وسیلہ بنایا۔ ان کا شعری نظریہ انسان اور سماج کی تطہیر و تعمیر پر مبنی تھا۔