باغ و بہار کا تعارف

پہلا درویش بنیادی طور پر کم زور ادارے، عدم استقلال اور خوشامدی فطرت پر کا نمائندہ کردار ہے۔ یمن کے ایک دولت مند تاجر کا بیٹا ہونے کے باوجود نابالغانہ حرکات اور ناپختہ فیصلوں نے اسے ورثے سے محروم کر دیا۔ اس کی شخصیت میں خودداری، عملی بصیرت اور مردانہ جرات واضح طور پر ناپید ہے۔ شہزادی سے اس کی وابستگی بھی عشق سے زیادہ خوشامدانہ جھکاؤ کی صورت رکھتی ہے، اس لیے اس کی محبت میں وقار یا استقامت نظر نہیں آتی۔
شہزادی کی بے رخی، اس کی مسلسل تابع داری اور اس کا ہر حکم بجا لانا اس کے نفسیاتی خلا، احساسِ کمتری اور شخصیت کی بے سمتی کو ظاہر کرتا ہے۔ جنگل میں اس کی گمشدگی اور اس کے انجام کی بے ترتیبی بھی اسی عدم تدبیر اور محدود بصیرت کی علامت ہے۔ مجموعی طور پر پہلا درویش ایک غیر مؤثر، غیر مردانہ اور کمزور کردار کے طور پر سامنے آتا ہے۔

داستانی ادب عام طور پر مافوق الفطرت عناصر، غیر حقیقی کرداروں اور تعجب خیز واقعات سے بھرا ہوا ہوتا ہے۔ جنات، دیو، پریاں، طلسماتی واقعات اور ناقابلِ یقین واقعات داستانوں کی فضا کو حقیقت سے دور لے جاتے ہیں؛ لیکن ’’باغ و بہار‘‘ اس دھند میں سے انسانی سماج، روزمرہ زندگی اور حقیقی جذبات کا ایسا عکس دکھاتی ہے جس سے کردار محض تخیلاتی نہیں رہتے بل کہ انسانی تجربے سے وابستہ نظر آتے ہیں۔

چار درویشوں کے قصے میں اگرچہ واقعاتی یکسانیت ہے اور ان کے طرزِ بیان میں ایک دوسرے کی جھلک ملتی ہے، مگر مرد کرداروں کے برعکس اس داستان کے نسوانی کردار زیادہ جاندار، فعال اور جذباتی گہرائی کے حامل ہیں۔

ان کرداروں میں:
شہزادی دمشق
ماہ رو
وزیر زادی
سراندیپ کی شہزادی
بصرے کی شہزادی

شامل ہیں، جو داستانوی فضا میں رہتے ہوئے بھی عملی عورت، جذباتی عورت، انتقامی عورت، باشعور عورت، مذہبی عورت اور باوقار عورت کے مختلف انسانی روپ پیش کرتی ہیں۔

شہزادی دمشق جذبات، انتقام اور عقل کی ہم آہنگی کی عمدہ مثال ہے۔نسوانی کرداروں میں سب سے منفرد، گہرا اور انسانی حقیقت کے قریب کردار شہزادی دمشق کا ہے۔وہ محبت میں دھوکہ کھاتی ہے، قید بھی ہوتی ہے اور موت کا سامنا بھی کرتی ہے، مگر وہ داستانوں کی روایتی شہزادیوں کی طرح بے بسی یا جذباتی شکست قبول نہیں کرتی۔اس کے کردار کا نمایاں پہلوشدتِ جذبات ،ضبطِ نفس کی کمی ،انتقامی ذہنیت ،عملی ذہانت ،خطرے کے وقت عقلی حکمت اورذہنی استقامت  ہیں۔جب وہ قید ہو کر شہرپناہ کی دیوار کے ساتھ لٹکائی جاتی ہے تو موت کے خوف کے باوجود خود کو دفنانے کا طریقہ بھی خود تجویز کرتی ہے—یہ وہ مقام ہے جو اسے روایتی شہزادیوں سے ممتاز اور حقیقت کے زیادہ قریب کر دیتا ہے۔