پریم چند کے ہاں افسانے کا مرکزی کردار اکثر وہی ہوتا ہے جو زندگی کی مشکلات سے دوچار ہے، چاہے وہ کسان ہو، مزدور، عورت یا بچہ۔ وہ سماج کے ہر اس طبقے کے ترجمان ہیں جو ہمیشہ پس منظر میں رہا جس کی وجہ سے ان کے افسانے عوامی ادب میں  شمار کیے جا سکتے ہیں۔ ان کی کہانیوں میں پلاٹ کی سادگی کے باوجود ایک گہری معنویت پائی جاتی ہے۔ وہ کسی فلسفے یا مصنوعی پیچیدگی کے قائل نہیں تھے بل کہ انسانی تجربات کی سچائی پر یقین رکھتے تھے۔عورت ان کے افسانوں کا نمایاں اور اہم کردار ہے جس  کے لیے پریم چند  کے ہاں  گہری معنویت  اور معاشرتی روایات کے خلاف بغاوت بھی نظر آتی ہے۔بقول پریم گوپال متّل

یہ حقیقت ہے کہ پریم چند نے اردو افسانے کی جو بنیاد ڈالی تھی آگے چل کہ اس پر اردو فِکشن کی ایک شان دار اور جان دارا مارت تعمیر ہوئی۔ آج اُردو افسانہ جس مقام پر ہے اس کا تمام تر سہرا پریم چند کے سر ہے۔ پریم چند کو ایک اور خصوصیت حاصل ہوئی جو بہت کمر ادیبوں کے حصے میں آئی ہے کہ انھیں بہ یک وقت ملک کی دو بڑی زبانوں یعنی اُردو اور ہندی نے اپنا اپنا ادیب تسلیم کیا اور اس طرح وہ نہ صرف جدید اُردو افسانے بل کہ جدید ہندی افسانے کے بانی بھی مانے گئے۔ ہندی میں  پریم چند پر اتنا کچھ لکھا جا چکا ہے کہ شاید اب مزید کوئی نئی بات کہنے کی گنجائش نہ رہی ہو لیکن ہماری زبان اُردو میں ابھی اس طرح کی کاوشوں کی بہت گنجائش ہے۔ ہندی میں پریم چند کی جملہ تصانیف ناول افسانے بہ آسانی دستیاب ہیں جب کہ اُردو اس کی منتظر ہے۔