ملا وجہی کی مثنوی’’ قطب مشتری‘‘ دکنی داستان گوئی کی ایک درخشاں مثال ہے جس میں عشق، مہم جوئی اور ماورائی عناصر ایک دوسرے میں یوں حل ہو جاتے ہیں کہ پوری حکایت طلسماتی فضا میں سانس لیتی محسوس ہوتی ہے۔ اس داستان میں کرداروں کے نام سیاروں اور فلکیاتی علامتوں سے ماخوذ ہیں، جو اس مثنوی کی تخلیقی فضا کو اور زیادہ رمز آفریں بنا دیتے ہیں۔ اس مثنوی کے اہم کردار کل بارہ ہیں اور ہر کردار اپنے عمل، مزاج اور تعلق کے باعث داستان کے کسی نہ کسی مرحلے میں بنیادی اہمیت اختیار کر لیتا ہے۔

سلطان ابراہیم قطب شاہ برسوں سے اولادِ نرینہ کی دعا میں مصروف تھا۔ تقدیر نے بالآخر اس کی التجائیں سن لیں اور محل میں ایسا فرزند پیدا ہوا جس کے حسن کی تابانی کا چرچا دکن سے سرحدوں کے پار تک جا پہنچا۔ یہی شہزادہ بعد ازاں محمد قلی قطب شاہ کے نام سے پہچانا جاتا ہے۔شہزادہ جب شباب کی دہلیز پر پہنچا تو ایک رات اس کی خواب گاہ میں نور کی بارش سی ہوئی، اور خواب میں ایک ایسی دوشیزہ نمودار ہوئی جس کے حسن نے اس کی روح پر نقشِ لازوال بنا دیا۔ بیدار ہوا تو گویا دل اور ہوش سب خواب کی اسی پری رو شہزادی کے ہاتھ گروی رکھ آیا تھا۔ اس کے غم و اندوہ نے پورے قصر میں اضطراب پھیلا دیا۔

سلطان نے شہزادے کی اداسی کا مداوا کرنے کے لیے اطراف و بلاد کی حسیناؤں کو جمع کیا، مگر شہزادے کی نگاہ کسی پر نہ ٹھہری۔ بالآخر اس نے اپنی کیفیتِ عشق بادشاہ کو بتائی، جس پر سلطان نے اپنا قدیم سفیرِ خاص عطارد طلب کیا،جو مصوری میں یکتا، سیاحت میں کامل اور دنیادیدہ شخص تھا۔عطارد نے بتایا کہ دنیا کی سب سے حسین شہزادی ’’مشتری‘‘ ہے، جو بنگالہ کے شاہی خاندان سے وابستہ ہے۔ اس نے اس شہزادی کی تصویر بھی دکھائی، جسے دیکھ کر شہزادے نے فوراً پہچان لیا کہ یہی وہ سراپا ہے جو اس کے خواب میں جلوہ گر ہوئی تھی۔

اس کے بعد قطب شاہ اور عطارد سوداگر کے روپ میں بنگالہ کی جانب نکلتے ہیں۔ راستے میں اژدہوں سے مقابلے ہوتے ہیں، دیو قامت راکشس رکاوٹیں بنتے ہیں، اور کئی پراسرار کردار راہ میں آتے ہیں۔ انہی مہمات کے دوران شہزادے کی ملاقات مریخ خان سے ہوتی ہے جو اسد خان کا بیٹا ہے اور اپنی خواب دیدہ معشوقہ زہرہ (مشتری کی بہن) کی تلاش میں بھٹکتا پھر رہا ہے۔ دونوں ایک دوسرے کے رفیقِ سفر بن جاتے ہیں۔

راکشس کے قید خانے سے چھٹکارا پانے کے بعد سفر انھیں قلعۂ گلستان تک لے جاتا ہے، جو دیوستان اور پریستان کا سنگم سا تھا۔ یہاں مہتاب پری شہزادے کے حسن و خُلق پر فریفتہ ہو جاتی ہے اور اسے اپنے محل میں جگہ دیتی ہے۔ شہزادہ وقتی طور پر اس مہتابی دلربائی میں محو رہتا ہے، مگر دل کی نگاہیں اسی مشتری کے تصور میں روشن رہتی ہیں۔

دوسری طرف عطارد بنگالہ پہنچ کر اپنے فنِ مصوری کے ذریعہ وہاں شہرت حاصل کرتا ہے۔ جب وہ مشتری کے محل میں دیوار نگاری کے لیے بلایا جاتا ہے تو ادھر شہزادہ قطب کی ایک تصویر دیکھ کر مشتری خود بھی اس کی محبت میں گرفتار ہو جاتی ہے۔ عطارد اس موقع کو غنیمت جان کر شہزادے کو خبر دیتا ہے۔شہزادہ مہتاب پری سے اجازت لے کر بنگالہ روانہ ہوتا ہے، اور پری اسے ایک طلسمی گھوڑا ’’ترنگ بادپا‘‘بطور تحفہ دیتی ہے۔ بنگالہ پہنچ کر قطب اور مشتری کی ملاقات ایک جشن و سرور کی فضا میں ہوتی ہے۔ ادھر زہرہ کے لیے مریخ خان کا رشتہ طے پاتا ہے اور بنگالہ کی سلطنت اسی کے حوالے کیے جانے کا فیصلہ ہوتا ہے۔

قصہ یہاں سے اختتام کی جانب بڑھتا ہے جب قطب اور مشتری دکن پہنچتے ہیں۔ شاہی دربار میں شادی کی پرتکلف تقریبات منعقد ہوتی ہیں اور ابراہیم قطب شاہ اپنی سلطنت بیٹے کے سپرد کر دیتا ہے۔ یوں مثنوی ایک دل کش اور خوشگوار انجام پر منتج ہوتی ہے۔