اردو ادب کے کلاسیکی شعرا میں میر غلام حسن جن کا تخلص حسنؔ تھا، ایک نمایاں اور منفرد مقام رکھتے ہیں۔ وہ قدیم دہلی کے محلہ سید واڑہ میں پیدا ہوئے۔ ان کے والد کا نام میر غلام حسین ضاحکؔ تھا جو خود بھی شاعر تھے۔ میر حسنؔ نے اپنی ابتدائی تعلیم و تربیت دہلی میں حاصل کی، جہاں وہ پہلے اپنے والد کے زیرِ تربیت رہے، بعد ازاں خواجہ میر دردؔ جیسے ممتاز صوفی شاعر کے شاگرد بنے۔ لکھنؤ آنے کے بعد ان کی شعری تربیت میر ضیاء الدین ضیاؔ کے زیرِ اثر ہوئی۔

دہلی سے فیض آباد کی طرف ان کی ہجرت دراصل اس وقت کے سیاسی اور تہذیبی تغیرات کا نتیجہ تھی۔ جب نواب آصف الدولہ نے اہلِ علم و فن کی سرپرستی کو فروغ دیا تو دہلی کے بہت سے ممتاز شعرا فیض آباد اور لکھنؤ کا رخ کرنے لگے۔ میر حسنؔ بھی انھی میں شامل تھے۔ لکھنؤ پہنچ کر ان کے تخلیقی جوہر نکھر کر سامنے آئے اور وہ جلد ہی اس دبستانِ شاعری کے معتبر رکن بن گئے۔

میر حسنؔ کی شخصیت نہ صرف فنونِ لطیفہ سے آشنا تھی بل کہ ان کی ظرافت، خوش مزاجی اور شگفتہ طبیعت نے بھی انہیں اہلِ لکھنؤ میں مقبول بنا دیا۔ ظاہری وضع قطع کے لحاظ سے وہ درمیانے قد، گوری رنگت اور نہایت سلیقہ شعار شخصیت کے مالک تھے۔ سر پر بانکی ٹوپی اور کمر سے دوپٹہ باندھنا ان کی وضع داری کا حصہ تھا۔ ۱۷۸۶ءمیں ان کا انتقال لکھنؤ میں ہوا اور انھیں مفتی گنج میں نواب قاسم علی خاں کے باغ کے عقب میں سپردِ خاک کیا گیا۔

میر حسنؔ کا خانوادہ اردو مرثیہ نگاری کی روایت میں ایک نمایاں مقام رکھتا ہے۔ ان کے فرزندوں میں میر خلیقؔ اور میر خلقؔ نے مرثیہ گوئی میں شہرت حاصل کی، مگر اس خانوادے کو دوام میر انیسؔ کے ذریعے حاصل ہوا، جنھوں نے مرثیہ گوئی کو ایک فنِ کامل کی حیثیت عطا کی۔

میر حسنؔ کی تصانیف میں ایک دیوانِ شاعری، ایک تذکرۂ شعرائے اردو اور متعدد مثنویاں شامل ہیں۔ ان کی سب سے مشہور مثنوی “سحرالبیان” ہے جو ان کی ادبی زندگی کا شاہکار شمار کی جاتی ہے۔ یہ مثنوی ۱۷۸۴ءمیں ان کے انتقال سے تقریباً تین سال قبل مکمل ہوئی۔ بعد ازاں جان گل کرسٹ کی خواہش پر میر بہادر علی حسینی نے اسے ۱۸۰۲ء میں نثر کے قالب میں ڈھالا، اور ۱۸۰۳ءمیں یہ مثنوی پہلی مرتبہ فورٹ ولیم کالج، کلکتہ سے شائع ہوئی۔ اس کی غیر معمولی مقبولیت کے باعث ۱۸۰۵ءمیں اس کا دوسرا ایڈیشن بھی شائع ہوا۔ بعدازاں اس کے انگریزی، ہندی اور پشتو زبانوں میں تراجم ہوئے، جن میں ملا احمد تراہی کا پشتو منظوم ترجمہ (۱۸۸۰ء) خاص طور پر قابلِ ذکر ہے۔

ادبی اعتبار سے میر حسنؔ نے غزل، قصیدہ، مرثیہ اور مثنوی ،تمام اصناف میں طبع آزمائی کی، تاہم ان کی اصل شہرت مثنوی نگاری سے وابستہ ہے۔ ان کی شاعری میں روانی، فصاحت، محاورہ بندی اور فکری توازن نمایاں ہے۔ اگرچہ ان کی غزلوں میں بھی شعریت کا حسن موجود ہے، لیکن مثنویوں میں ان کے تخلیقی جوہر اپنی معراج کو پہنچے۔ “سحرالبیان” نہ صرف میر حسنؔ کی فنی بلوغت کا مظہر ہے بل کہ اردو مثنوی کو کلاسیکی وقار بخشنے والی ایک ایسی تخلیق ہے جس نے آنے والے شعرا کے لیے اسلوب، موضوع اور ساخت کے نئے راستے متعین کیے۔

اردو شاعری میں میر حسن کا درجہ بہت بلند ہے۔ انھوں نے مرثیے ، قصیدے ،غزلیں اور مثنویاں لکھی ہیں۔ غزل میں بھی اُن کا درجہ خاصا بلند ہے۔کلام میں روانی اور بے ساختگی بہت ہے مگر ان اصناف میں سب سے زیادہ شہرت اور مقبولیت  مثنوی نگاری میں ہوئی۔ مثنویاں تو کئی لکھیں مگر ان میں سب سے زیادہ شہرت صرف ’’ سحر البیان ‘‘ کو نصیب ہوئی جو  ان کے آخری دور کی یادگار ہے۔ اور ان کا قابل قدر کارنامہ ہے۔

میرحسن نے مثنوی’’ سحر البیان ‘‘میں شہزادہ بے نظیر اور شہزادی بدر منیر کا قصہ نظم کیا ہے۔ یہ  مثنوی اردو ادب میں کلا سیک  کا درجہ رکھتی ہے۔ اس کا طرز بیان نہایت صاف اور  سلجھا ہوا ہے ۔ زبان بھی سلیس اور با محاورہ استعمال کی ہے۔ مثنوی کے اہم کردار ’’بے نظیر، بدر منیر ،نجم النساء، ماہ رخ اور فیروز  شاہ ‘‘ہیں۔ میر حسن نے  مثنوی میں اپنی مصورانہ شاعری کا کمال اس انداز سے پیش کیا ہے کہ واقعات کی تصویر ہو بہو سامنے آجاتی ہے۔

اردو میں بے شمار شنویاں لکھی گئی ہیں مگر میر حسن کی مثنوی کا اگر کسی سے مقابلہ کیا جاسکتا ہے تو وہ پنڈت دیا شنکر نسیم کی مثنوی’’ گلزار نسیم ‘‘ہے۔ لیکن سحر البیان کی زبان میں سلاست، روانی اور بے ساختگی ہے جو  دیا شنکر نسیم کی  مثنوی میں نہیں  ہے۔ نسیم کی مثنوی میں نازک خیالی اور معنی آفرینی ہے ۔

 اس کے بہت سے  شعر ضرب المثل بن گئے ہیں ۔ الفاظ میں سادگی اور  سلاست کوٹ کوٹ کر بھر دی ہے ۔ چند شعر ملاحظہ ہوں ۔

سرا عیش دوراں دکھاتا نہیں

گیا وقت پھر ہاتھ آتا نہیں

کٹی رات حرف و حکایات میں

سحر ہو گئی بات کی بات میں

کسی پاس دولت یہ رہتی  نہیں

 سدا نا ؤ کا غذ کی بہتی نہیں

درختوں کی کچھ چھاؤں اورکچھ  وہ  دھوپ

وہ دھانوں کی سبزی و ہ سرسوں کا روپ

اب دیوانی سی ہر سمت پھرنے لگی

درختوں میں جا جا کے گرنے لگی

چین پر نہ مائل نہ گل پر نظر

وہی سامنے صورت آٹھوں پہر