میر تقی میر کی غزل اور حالات زندگی

ملک حجاز کے ناموافق حالات سے تنگ آکر ایک خاندان ہجرت کرکے دکن پہنچا اور کچھ عرصہ قیام کرنے کے بعد احمد آباد آگیا۔ اس خاندان کے کچھ افراد وہیں رہ گئے جب کہ کچھ ہجرت کر کے تلاشِ روز کار کے سلسلے میں مغلوں کے دورِ حکومت میں اکبر آباد آگئے۔یہاں کی آب و ہوا انھیں راس نہ آئی اور اُن میں صرف ایک لڑکا  ،میرا کے دادا ،بچا۔انھوں نے فوج میں ملازمت کی اور پچاس سال کی عمر پائی۔ان کے دو لڑکے تھے۔ایک جوانی میں ہی خلد دماغ کے باعث وفات پاگئے جب کہ دوسرے بیٹے محمد علی نے ،شاہ کلیم اللہ اکبر آبادی سے علومِ متداولہ کی تحصیل کرکے درویشی اختیار کرلی اور اپنے زہد و تقویٰ کی بنا پر علی متقی کہلائے۔ان کی پہلی شادی سراج الدین علی خان آرزو کی بڑی بہن سے ہوئی جن سے محمد حسن پیدا ہوئے اور دوسری  بیوی سے دو بیٹے محمد تقی اور محمد رضی اور ایک بیٹی  پیدا ہوئے۔محمد تقی بڑے ہوکر خُدائے سخن میر تقی میر کہلائے۔

محمد تقی میر (۱۷۲۲ء۔۲۳ء۔ستمبر ۱۸۱۰ء) کی ولادت کے بارے میں مختلف آراء ہیں۔لیکن میر کے بھتیجے محمد  محسن   نے جو عبارت    ’’دیوان  چہارم‘‘ پر تحریر کی ہے اس کے مطابق’’ میر ۲۰ شعبان ۱۲۲۵ھ کو براز جمعہ بوقت شام  لکھنو کے  محلہ میں نوّے سال کی عمر پوری کرکے انتقال کر گئے‘‘۔ اور یہ کہ میر صاحب اکھاڑہ بھیم قبرستان میں اپنے اقربا کے قریب مدفون ہوئے۔(۱)

میر کا زمانہ برِ عظیم کی تاریخ میں انتشار و خلفشار  کا دور تھا۔ معاشرے  تہذیبی و فکری   رودو بدل سے  معاشرت تہذیبی زوال کا شکار تھی۔میر تقی میر کے زمانے کا عہد سیاسی، سماجی اور تہذیبی زوال کا زمانہ تھا۔ دہلی کی چمکتی ہوئی گلیاں اجڑ چکی تھیں، سلطنتِ مغلیہ ٹوٹ پھوٹ کا شکار تھی، درباروں کی رونق ماند پڑ گئی تھی اور اہلِ علم و فن معاشی تنگی اور بے قدری کا شکار تھے۔ اقدار بدل رہی تھیں، عشق و ادب کی نرمیوں کی جگہ دنیا داری، خود غرضی اور مفاد پرستی نے لے لی تھی۔ میر کے اشعار میں اسی ٹوٹے ہوئے معاشرے کی صدائیں، دل شکستگی، اجڑتے ہوئے شہر اور بکھرتی ہوئی انسانی قدریں ایک دردناک موسیقی کی صورت سنائی دیتی ہیں۔مختصراً، یہ وہ دور تھا جب تہذیب کے چراغ بجھ رہے تھے، اور میر کے شعر ان بجھتے چراغوں کی آخری روشنی بن گئے۔

میر نے اپنے والد کی وفات (دسمبر ۱۷۳۳ء) کے بعد اپنے چھوٹے بھائی  ،محمد رضی  ، کو گھر بٹھا کر اطرافِ شہر میں روزگار کی تلاش کی اور ۱۷۳۴ء۔۳۵ء میں شاہجہان  آباد کے لیے روانہ ہوئے۔کچھ عرصہ بعد دہلی میں خواجہ محمد باسط سے ان کی ملاقات ہوئی اور انھوں نے میر کو اپنے چچا صعصام الدولہ  کی خدمت میں پیش کیا۔انھوں نے ایک روپیہ روز وظیفہ مقر کردیا  اور یہ وظیفہ میر کو ۱۷۳۹ء تک ملتا رہا۔

اس وقت دلہ میں نادر شاہ نے لوٹ کھسوٹ کا بازار گرم کر رکھا تھا۔ جب وہ یہاں سے روانہ ہوا تو میر ناچار اپریل ۱۷۳۹ء کو  کو دوسری بار دلی اپنے سوتیلے ماموں  سراج الدین علی خان آرزا کے پاس ٹھہرے۔اس وقت میر سترہ سال کے تھے اور وہاں سات سال رہے پھر ان سے ناراض ہو کر  ریاعت خاں کے متوسل ہوئے تو  پہلی بار ۱۷۴۷ء۔۴۸ء میں ،احمد شاہ ابدالی کی افواج کے ساتھ مقابلہ کرنے کے لیے میر بھی  رعایت خاں کے ساتھ تھے۔

میر تقی میر نے خان آرزو سے  زانوئے تلمذ بھی کیا  ۔میر نے ۱۷۴۰ء۔۴۱ء  میں حالتِ جنون میں   خان آرزو  کے مشورے سے ریختہ گوئی شروع کی۔میر ۱۷۳۹ء میں دلی آئے تھے اور  کچھ عرصے بعد جنون کے مرض، جو کہ ان کا خندانی مرض تھا، میں مبتلا  ہو گئے۔ ان کے چچا  اسی بیماری  میں فوت ہوئے۔میر کو صحت یاب ہونے میں ایک سال  سے زیادہ کا عرصہ  لگا ۔ اس کا ذکر میر نے ’’ذکرِ میر‘‘ میں کیا ہے اور  اس موضوع پر ایک مثنوی ’’خواب و خیال‘‘ بھی لکھی۔میر کی شاعری کا آغاز  ان کی بیماری کے دوران ہوا،اور بیماری کے بعد  تعلیم کا سلسلہ شروع ہوا۔

کچھ عرصہ بعد میر نے خواجہ سرا نواب بہادر جاوید خاں کی ملازمت اختیار کرلی۔میر کا یہ زمانہ قدرے آرام سے گزرا اور اسی زمانے میں میر نے اپنا تذکرہ ’’نکات الشعرا‘‘ مکمل کیا۔۱۷۵۳ء۔۵۴ء میں مرہٹوں نے پھر دلی کو تاراج کیا اور عماد الملک نے احمد شاہ کی آنکھوں میں سلائیوں بھیر کر اندھا کردیا۔ میر کا یہ شعر اسی واقعے کی طرف اشارہ کرتا ہے

شہاں کہ کحلِ جواہر تھی خاکِ پا جن کی

   انھی کی آنکھوں میں پھرتے سلائیاں دیکھیں

میر اس سفر میں احمد شاہ کے ہم راہ تھے اور واپس آ کر گوشہ نشین ہو گئے۔۱۷۵۷ء میں احمد شاہ ابدالی نے دلی پر  پھر حملہ کیا تو  میر اپنے اہل و  عیال کے ساتھ  دلی سے نکل کھڑے ہوئے۔راستے میں راجہ  جگل کشور کی بیوی  انھیں  اپنے ساتھ برسانہ  لے گئیں  وہاں سے میر کھمبیر پہنچے اور   راجہ ناکر مل سے وظیفہ حاصل کیا جو ۱۳ سال قائم رہا۔اس کے بعد پے در پے حملوں سے میر پھر بے آسرا ہو گئے۔ ڈاکٹر جمیل جالبی لکھتے ہیں

اگر ان سب حالات پر نظر ڈالی جائے تو اپنے والد کی وفات سے لے کر ۱۷۷۲ء تک میر نے زندگی میں پریشانیوں ،افلاس، ویرانیوں اور خانہ جنگیوں کے علاوہ کچھ نہیں دیکھا۔ آسودگی نام کی کوئی چیز ان کی زندگی میں کبھی نہیں آئی۔(۲)

۔۱۷۷۲ء  سے لکھنؤ جانے تک ۱۷۸۲ء کا زمانہ ،جسے میر نے خانہ نشینی کا زمانہ کہا ہے، معاشی بدنصیبیوں کا زمانہ تھا۔میر لکھنؤ پہنچے تو  آصف الدولہ نے  وظیفہ (مختلف روایات ے مطابق ۲۰۰۔۳۰۰) روپے ماہوار) مقرر کیا۔میر نے اپنی زنگی کے ۳۱ سال لکھنؤ میں گزارے اور ۱۸۱۰ء میں وفات پائی۔

میر تقی میر کی سیرت پر ان کے زمانے کے حالات و واقعات نے گہرے اثرات چھوڑے۔ وہ ایسے پُرآشوب دور میں زندہ رہے جب دہلی، جو کبھی علم و ادب اور تہذیب و شائستگی کا مرکز تھی، زوال کا شکار ہو رہی تھی۔ مغلیہ سلطنت کی کمزوری، نادر شاہ اور احمد شاہ ابدالی کے حملے، قتل و غارت، فاقہ کشی، اور بربادی نے میر جیسے حساس شاعر کے دل و دماغ پر گہرا نقش چھوڑا۔ بقول عبد الغنی

میر کے حالات یقیناً درد انگیز تھے اور ان کا ماحول یاس انگیز تھا۔ وہ رقیق القلب بھی تھے اور ان کی طبیعت میں انفعال کی کیفیت تھی۔ ان کے بے شمار اشعار اس حقیقت پر دلالت کرتے ہیں، ان کا آگرہ سے دلی اور دلی سے لکھنؤ منتقل  ہونا بجائے خود ایک قلبی  اضطراب کی نشان دہی کرتا ہے۔ ان کے دلِ پُر خوں کی مستی ہمیں معلوم ہے۔ان کی زیست میں نامرادی کا عنصر  موجود ہے مگر ان تلخ حقیقتوں کے درمیان ان کا طور و طریق کیا تھا؟ وہ کہتے ہیں

مرے سلیقہ سے میری نبھی محبت

       تمام عمر میں ناکامیوں سے کام لیا(۳)

ان حالات نے میر کی طبیعت میں غم، تنہائی، احساسِ شکست اور گہری داخلیت پیدا کی۔ وہ ظاہری دنیا سے مایوس ہو کر اپنے اندر کی دنیا میں پناہ لینے لگے۔ یہی وجہ ہے کہ ان کی شاعری میں درد،سوز ،کرب اور شکستگیِ دل کی جھلک نمایاں نظر آتی ہے۔ ان کی سیرت  میں انکسار ،خود داری ،حساسیت ، اور غم پرور مزاج ان حالات کی دین ہے۔ بقول شاہد پرویز

میر کی شخصیت کی انا پسندی اور خود پسندی دراصل ان کا علم تھا۔ وہ علم محض شعر ہی نہیں تھا بل  کہ اپنے عہد کے علمی ماحول میں ان سارے لوگوں کا تھا جو ان کے معاصر تھے اور ان کی جملہ صلاحیت میں میر اپنے کو فوقیت دیتے تھے، اس سے اندازہ لگایا  جا سکتا ہے کہ  ان کی شخصیت کی ظاہری پیچیدگیوں کے اندر ایک ناقابل تسخیر شخصیت تھی جو اس وقت بھی اور آج بھی  چونکاتی ہے۔‘‘(۴)

میر نے چھ دواوین پر مشتمل اپنا ضخیم کلیات اُردو ، جس میں بیش تر اصنافِ سخن موجود ہیں، یادگار چھوڑا  بل کہ فارسی  دیوان کے علاوہ  فارسی نثر میں اُردو شعرا کا ’’تذکرہ نکات الشعرا، فیض میر، دریائے عشق، اور ذکرِ میر‘‘ بھی تصنیف کیے ۔

’’نکات الشعراء‘‘۱۷۵۲ء اہم تذکرہ ہے جس میں ایک سو تین  اُردو شاعروں کے مختصر حالات کے ساتھ اُن کے کلام کا انتخاب بھی درج ہے۔

’’فیض میر‘‘ میر نے اپنے بڑے  بیٹے  فیض علی میر  کے لیے ۱۷۶۰ء۔۶۲ء میں   لکھی  تھی۔اس میں میر نے خدا رسیدہ درویشوں اور مجذوبوں کے محیر العقول واقعات و کرامات کو حکایات کے انداز میں بیان کیا ہے۔

’’دریائے عشق‘‘ میر کی مشہور اردو مثنوی ہے۔ میر نے اسی قصے کو فارسی نثر(دریائے عشق کے نام سے) میں  بھی لکھا ہے۔

’’ذکرِ میر‘‘ کود نوشت سوانح ہے جو میر کے عہد کے بہت سے راز کھولتی ہے۔یہ فارسی میں لکھی گئی ہے۔