مرزا غالب کے حالات زندگی،شاعری،نثر اورپی۔ڈی۔ایف تصانیف

مرزا اسداللہ خان غالب (پ: ۱۷۹۶ء، آگرہ) اردو اور فارسی کے اُن نابغۂ روزگار اہلِ قلم میں سے ہیں جنھوں نے برِّصغیر کی فکری و ادبی روایت کو غیر معمولی وسعت بخشی۔ وہ ایک ترکمانی النسل خاندان کے وارث تھے۔ ان کے اجداد میں سے سب سے پہلے عبدالصمد خان ہندوستان آئے اور شاہ عالم ثانی کے دربار میں منصب دار مقرر ہوئے۔مرزا کے دادا،مزرا قوقان بیگ کچھ عرصہ لاہور میں رہے بھر دہلی پہنچے اور شاہ عالم ثانی کی فوج میں ملازم ہوئے۔ان کے دو بیٹے تھے، عبد اللہ بیگ اور نصر اللہ بیگ۔ عبد اللہ بیگ کے تین بچے ،ایک بیٹی اور دو بیٹے تھے۔ بڑے بیٹے اسد اللہ بیگ اور چھوٹے  مرزا یوسف  تھے۔ غالب کے والد عبد اللہ بیگ فوج میں برسرِ خدمت تھے اور الور کی مہم میں شہید ہوئے۔ بعد ازاں چند سال چچا کی سرپرستی میں پرورش پانے کے بعد حکومت کی جانب سے وظیفہ مقرر ہوا۔ ابتدائی تعلیم و تربیت آگرہ میں ہی ہوئی، اور محض تیرہ برس کی عمر میں شادی کے بعد وہ ہمیشہ کے لیے دہلی منتقل ہوگئے،وہی دہلی جس نے ان کے فن کو جِلا دی اور انہیں آسمانِ سخن کا درخشاں ستارہ بنا دیا۔

غالب کو بادشاہِ دہلی بہادر شاہ ظفر نے نجم الدولہ، دبیر الملک اور نظام جنگ جیسے معزز القابات سے نوازا۔ یہ اعزازات نہ صرف اُن کی علمی حیثیت کے اثبات تھے بل کہ دربار میں ان کے قد و قامت کا واضح اعتراف بھی تھے۔