سودا کے اجداد  بخارا سے ہندوستان آئے اور دہلی میں سکونت اختیار کی۔مولانا محمد حسین آزاد نے’’ آبِ حیات‘‘ میں ان کے اجداد کا  پیشہ سپہ گری لکھا ہے۔ مرزا کے والد مرزا شفیع کے بارے میں قیاس ہے کہ دہلی میں پیدا ہوئے اور ایک تاجر تھے۔مرزا محمد رفیع سودا کی  تاریخ پیدائش کے بارے میں وثوق سے نہیں کہا جا سکتا البتہ ان کا سال دلادت مختلف ذرائع کی بنا پر۱۷۰۶ء۔ ۱۷۰۳ء  کے مابین قرار دیا گیا ہے اور  وفات کے وقت ان کی  عمر  ۸۰ سے زیادہ تھی ۔انھوں نے اپنے دور کے مروّجہ علوم ضرور حاصل کیے ہوں گے،یہ ان کے کلام سے اندازہ ہوتا ہے کیوں کہ ان کو زبان پر خاصی قدرت حاصل ہے۔

مرزا کے ہم عصر تذکرہ نگاروں میں سے  صرف گردیزی نے انھیں سپاہی پیشہ لکھا ہے۔سری رام کے مطابق مرزا کو ترکی،فارسی، اور عربی میں  دست گاہ تھی۔(خم خانہ جاوید،سری رام،ص۳۶۴)ڈاکٹر اشپنگر نے مرزا کے تخلص ’’سواد‘‘ کے حوالے سے لکھا ہے کہ یہ تخلص انھوں نے اپنے والد کے پیشے کے لحاظ سے رکھا جب کہ خان آرزو نے سوداگری کے پیشے کو اس تخلص کی وجہ بتایا ہے۔

تذکرہ نگاروں کے ہاں مرزا کے چار استادوں کے  نام ملتے ہیں:’’قائم نے لکھا ہے  کہ سواداؔ خانِ آرزو کے شاگرد تھے۔لیکن  اپنے کچھ اشعار حاتم کو بھی سناتے تھے۔کریم الدین نے بھی انھیں شاگردِ خانِ آرزو لکھا ہے۔ (مرزا محمد رفیع سودا، ڈاکٹر خلیق انجم ، ص۸۱۔۸۴) سودا کے استادوں میں دوسرا نام سلمان قلی خاں  کا ہے۔تیسر ےاستاد شاہ حاتم ؔ تھے۔جب کہ قدرت اللہ قاسم نے اس سلسلے میں نظام الدین احمد  صانع کا نام بھی لیا ہے۔

روایت کے مطابق نواب آصف الدولہ نے سوداؔ کو ملک الشعراء کا خطاب دیا جب کہ حقیقت یہ ہے کہ  اس  خطاب سے شیخ حزیںؔ نے اس شعر پر سودا کو نوازا تھا۔

         ناوک نے تیرے صید نہ چھوڑا زمانے میں   

تڑپھے ہے مرغ قبلہ نما آشیانے میں

بعض تذکرہ نگاروں نے میر غلام حیدر مجذوبؔ کو مرزا سودا کا بیٹا اور بعض نے شاگرد بتایا ہے۔مولانا آزاد نے ان کے ایک نواسے  کا بھی ذکر کیا ہے۔

سوداکے عہد میں علم مجلسی باقاعدہ ایک فن تھا۔ مروجہ علوم کے ساتھ ساتھ اس فن پر بھی پوری توجہ دی جاتی اور شعر و شاعری علم مجلسی کا ایک حصہ تھی۔ لوگ اپنے بچوں کی تربیت کے لیے گھر پر استا د رکھتے تھے۔جو انھیں آداب مجلس سے واقف کرتے اور اُن کی طبیعتوں میں شعر و شاعری سے ایک لگاؤ پیدا کرنے کی کوشش کرتے تھے ۔ شگفتہ مزاجی ، برجستگی ، شعر و شاعری سے لگا ؤ، محفل میں نشست و برخاست کے آداب اور  بڑوں کا ادب و احترام  وغیرہ خصوصیات تھیں جو ہر مہذب انسان کے لیے ضروری تھیں۔

سودا کے احباب اور شاگروں کی تعداد کثیر تھی۔چوں کہ ان کے مزاج میں ظراف کوٹ کوٹ کر بھری ہوئی تھی اس لیے وہ غیر معمولی طور پر مشہور تھے۔مرزا رفیع سوداؔ کو موسیقی کے علاوہ کتے پالنے کا بھی شوق تھا۔

سودا جب اودھ پہنچے تو نواب شجاع الدولہ کا زمانہ تھا۔سودا نے فیض آباد میں قیام کیا۔نواب ان کی بہت عزت کرتے تھے۔جب نواب کی وفات کے بعد نواب آصف الدولہ مسند نشین ہوئے تو تو سودا لکھنؤ چلے گئے۔ لکھنؤ میں ان کی مالی حالت اچھی نہ تھی۔