پریم چند کا فکری و فنی مطالعہ اور حالاتِ زندگی

پریم چند کے والد منشی عجائب لال تھے اور والدہ آنندی دیوی تھیں۔پریم چند ۳۱ جولائی ۱۸۸۰ء کو ہفتے کے روز پیدا ہوئے۔والد نے خوش ہو کر ان کا نام دھنپت رائے رکھا لیکن تایا یعنی مہا ویر لال انھیں نواب کہہ کر پکارتے تھے(۱) ان کا اصل نام دھنپت رائے تھا اور گھر میں انھیں نواب رائے کہا جاتا تھا۔ اسی نام سے انھوں نے اپنی ادبی زندگی کا آغاز کیا۔ ان کے والد عجائب رائے ڈاک خانے میں ۲۰روپے ماہوار کے ملازم تھے اور زندگی تنگی سے بسر ہوتی تھی۔پریم چند کی ابتدائی  اُردو اور فارسی  کی تعلیم ایک مولوی کے ہاں  لال پور گاؤں میں ہوئی جو پیشے کے اعتبار سے درزی تھے۔اس وقت ان کی عمر پانچ برس کی تھی۔پریم چند نے ایک طویل عرصے کے بعد بچپن کی  یادوں کو کہانیوں کے روپ میں پیش کیا۔

چوری     (مادھوری،ستمبر،۱۹۲۵ء،پریم چالیسی۱)

قزاقی     (مادھوری،اپریل، ۱۹۲۶ء، پریم چالیسی۱)

رام لیلا    (مادھوری،اکتوبر ، ۱۹۲۶ء، پریم چالیسی۱)

گلی ڈنڈا    (ہنس،فروری،۱۹۳۳ء،واردات)

ہولی کی چھٹی          (زادِراہ)  (۲)

والدہ کی سنگرہنی کے دائمی مرض سے ۱۸۸۷ء۔۸۹ ء میں وفات کے ایک ڈیڑھ سال بعد والد نے دوسری شادی کرلی  اور پریم چند کی سوتیلی ماں نے ان سے ہمیشہ بُرا سلوک کیا جس کا ذکر انھوں نے اپنی یادوں میں کیا ہے۔

۔۱۸۹۲ء میں منشی عجائب لال کا تبادلہ گورگھپور ہوجانے کے بعد تیرہ سال کی عمر میں دھنپت رائے باقاعدہ سکول میں  چھٹے درجے  میں مشن ہائی سکول میں داخل کرو ائےگئے۔اسی دوران انھیں پتنگ بازی، سگرٹ بیڑی اور کہانیاں پڑھنے کا بھی شوق پیدا ہوا۔آٹھویں جماعت کے بعد باپ کے جمنیاکے لیے تبادلے سے بنارس میں داخلہ لیا اور ۱۸۹۷ء میں  سوتیلی ماں کے والد کی تجویز کردہ لڑکی سے بیاہ ہو گیا۔اس وقت دھنپت کی عمر سولہ برس کے پاس تھی۔دھنپت کو اپنی بیوی کی بد صورتی سے نفرت تھی۔ اسی دوران باپ کی حالت خراب ہونے پر رحلت ہو گئی۔اس کے بعد دھنپت اعلیٰ تعلیم حاصل کرنے کی تمنا میں مزدوری و محنت کرتے رہے اور پیسہ کما کر گھر بھی  دیتے رہے،ساتھ ہی ناول گردانی کا شوق بھی برارا چلتا رہا۔

کوئنس کالج کے پرنسپل مسٹر بیکن  کی کوشش سے ۲۱ ستمبر ۱۹۰۰ء  میں ماسٹر کے طور پر  بہرائچ سرکاری سکول میں بیس روپیہ ماہوار پر ان کی تقرری ہو گئی۔ پریم چند کی پہلی تخلیق ایک مزاحیہ ڈرامہ تھا جو انھوں نے ۱۴سال کی عمر میں اپنے ماموں  کا خاکہ اڑاتے ہوئے لکھا تھا۔ اگلے سال انھوں نے ایک اور ڈرامہ ’’ہونہار بروا کے چکنے چکنے پات‘‘ لکھا۔ یہ دونوں ڈرامے طبع نہیں ہوئے۔ ان کی ادبی زندگی کا باقاعدہ آغاز پانچ چھہ برس بعد ایک مختصر ناول ’’اسرار معابد‘‘ سے ہوا جو ۱۹۰۳ءاور ۱۹۰۴ءکے دوران بنارس کے ہفت روزہ ’’آوازۂ حق‘‘ میں قسط وار شائع ہوا۔اسی دوران لکھنے کا سلسلہ جاری رہا لیکن  پہلی تحریری ایک مقالے کی صورت میں بنارس کے  غیر معروف ہفتہ وار اخبار ’’آوازۂ خلق ‘‘ میں  یکم مئی ۱۹۰۳ء کو شایع ہوئی،جس کا نام’’آ لیور کرا م ویل‘‘ تھا اور یہ قسط وار ۲۴۔ستمبر ۱۹۰۳ء تک شایع  ہوتا رہا۔امرت رائے نے ’’وودھ پرسنگ‘‘ جلد۔۱ میں اس کا ہندی ترجمہ شایع کیا ہے۔(۳) اس کے بعد انھوں نے ۱۹۰۴ءمیں الہٰ آباد ٹریننگ اسکول سے تدریس کی سند حاصل کی اور ۱۹۰۵ءمیں ان کا تقرر کانپور کے سرکاری اسکول میں ہو گیا۔ یہیں ان کی ملاقات رسالہ ’’زمانہ‘‘ کے اڈیٹر منشی دیا نرائن نگم سے ہوئی جہاں سے ان کو مقبولیت ملی۔

پریم چند کے بیوی سے تعلقات اچھے نہیں تھے اس  لیے وہ اسے اپنی سوتیلی ماں کے پاس ہی رکھتے تھے اور ایک عورت سے داشتہ کے طور پر تعلقات قائم کررکھے تھے۔ بعد میں دوسری شادی شورانی دیوی کے ساتھ ہوئی تو بھی کچھ عرصہ اس عورت  سے تعلقات  رہے۔شادی کے بعد پریم چند  سب ڈپٹی انسپکٹر ہو گئے تھے۔

پریم چند کی پہلے کہانی’’عشقِ دنیا اور حُبِ وطن ‘‘ کے نام سے ’’زمانہ‘‘ میں اپریل کے شمارے میں شایع  ہو کر مقبول ہوئی تھی۔(۴)

یکم اپریل ۱۹۱۹ء میں انھوں نے  بی۔اے کے امتحان کے لیے پندرہ روز کی چھٹی لی اور  گورکھپور سے الہٰ آباد  چلے  گئے۔ الہٰ آباد یونیورسٹی سے نومبر ۱۹۱۹ء میں یہ امتحان انگریزی ادب، فارسی، اور تواریخ میں دوسرے درجے میں پاس کیا۔۱۱ ۔اور ۱۵ ستمبر کے دروان ایک بیٹے کی پیدائش ہوئی  مگر کچھ عرصے بعد وفات ہوگئی ،اس سے پہلے ایک بیٹی کی بھی پیدائش کے بعد ہی وفات ہوئی تھے۔ شیو رانی سے ان کے ایک بیٹی کملا اور دو بیٹے شری پت رائے اور امرت رائے پیدا ہوئے۔

۔۱۹۲۲ء کے دوران گاندھی کی تحریک کا اثر ان کی زندگی کے ساتھ ان کی تحریروں میں بھی نظر آتا ہے۔اس بنا پر انھوں نے اپنی ملازمت سے بھی استعفیٰ دیا۔اس دوران  دوسرے کاروبار کرنے کی ٹھانی بالآخر۱۹۲۳ء میں بنارس مد ھیہ میشور  کے علاقے میں ایک مکان کرائے پر لیا اور پریس مشین لگا کر ’’سرسوتی پریس‘‘ کا آغاز کیا۔مگر یہ پریس گھاٹے میں گیا اور ناول ، افسانے لکھتے رہے۔’’مادھوری‘‘ میں ملازمت بھی کی۔ ۱۹۲۹ءمیں انھوں نے ہندی/اردو رسالہ ’’ہنس‘‘ نکالا۔ حکومت نے کئی بار اس کی ضمانت ضبط کی لیکن وہ اسے کسی طرح نکالتے رہے۔ ۱۹۳۴ءمیں وہ ایک فلم کمپنی کے بلاوے پر بمبئی آئے اور فلم ’’مزدور‘‘ کی کہانی لکھی لیکن بااثر لوگوں نے بمبئی میں اس کی نمائش پر پابندی لگوا دی۔ یہ فلم دہلی اور لاہور میں ریلیز ہوئی لیکن بعد میں وہاں بھی پابندی لگ گئی کیوں کہ فلم سے صنعتوں میں بے چینی کا خدشہ تھا۔ اس فلم میں انھوں نے خود بھی مزدوروں کے لیڈر کا رول ادا کیا تھا۔ بمبئی میں انھیں  فلموں میں اور  بھی تحریری کام مل سکتا تھا لیکن انھیں فلمی دنیا کے طور طریقے پسند نہیں آئے اور وہ بنارس لوٹ گئے۔ ۱۹۳۶ءمیں پریم چند کو لکھنؤ میں انجمن ترقی پسند مصنفین کا صدرچنا گیا۔ پریم چند کی زندگی کے آخری ایّام تنگدستی اورمسلسل علالت کے سبب بہت تکلیف سے گزرے۔انھین  والدہ کی طرح دائمی ہاضمے کا مرض تھا۔ ۸۔اکتوبر ۱۹۳۶ءکو ان کا انتقال ہو گیا۔

پریم چند برصغیر کے ان گنے چنے ادیبوں میں شمار ہوتے ہیں جنھوں نے اردو اور ہندی دونوں زبانوں کو نہ صرف تخلیقی وسعت عطا کی بل کہ ان کے ذریعے سماجی اور اخلاقی اصلاح کی بنیاد بھی رکھی۔ ان کا اصل نام دھنپت رائے تھا، مگر ’’پریم چند‘‘ کے نام سے انھوں نے جو ادبی شناخت قائم کی، وہ آج بھی برصغیر کی فکری و ادبی تاریخ میں سنگِ میل کی حیثیت رکھتی ہے۔

تحقیقی اعتبار سے دیکھا جائے تو پریم چند کی زندگی اور فن دونوں ایک ارتقائی سفر کی کہانی ہیں۔ ابتدائی دور میں وہ رومانی اور داستانوی اسلوب سے متاثر نظر آتے ہیں، لیکن رفتہ رفتہ ان کی تحریروں میں حقیقت نگاری، معاشرتی اصلاح، اور سیاسی شعور کے گہرے نقوش ابھرتے ہیں۔ ان کی تحریروں پر تحریکِ آزادی، گاندھی ازم، اور عدم تعاون کی تحریک کے اثرات نمایاں ہیں، جس کا ثبوت ان کا بیس سالہ ملازمت سے استعفیٰ دینا ہے۔ یہ عمل نہ صرف ان کی سیاسی وابستگی بلکہ قومی وفاداری اور قربانی کے جذبے کی بھی علامت ہے۔

’’اُردو افسانہ‘‘ میں ابنِ کنول  نے ان کے فن کا یوں احا طہ کیا ہے:ص ۱۵

’’ پریم چند کے افسانے اُن کے وسیع مشاہدے اور گہرے نفسیاتی مطالعے کے سبب فطرت انسانی کے بہترین مرقعے بن گئے ہیں۔ ان کے افسانوں میں ہندستان کے سماجی ، سیاسی اور معاشی حالات کی بھر پور عکاسی کی گئی ہے۔ وہ اپنے پہلے ہی ناول’’ اسرار معابد ‘‘میں مذہبی پیشواؤں کے سبب معاشرے میں پیدا ہونے والی خرابیوں کو بیان کرتے ہیں۔ متوسط طبقہ کی زندگی کی الجھنیں’’ جلوہ ایثار ‘‘میں نمایاں طور پر نظر آتی ہیں ۔’’ بازار حسن ‘‘میں پریم چند نے ایک طوائف کی زندگی کو پیش کر کے سماج کے ایک اور تاریک پہلو کی طرف اشارہ کیا ہے ۔’’ گوشتہ عافیت‘‘ میں کسانوں اور دیہات میں بسنے والوں کے مسائل کو ’’گؤدان‘‘ کی طرح پیش کرتا ہے۔ پریم چند کے طویل ناول ” چوگان ہستی اور میدان عمل‘‘ میں اُن کے عہد کی سیاسی سرگرمیاں بھی شامل ہو جاتی ہیں۔ غرض یہ کہ پریم چند نے اپنے تمام ناولوں میں اپنے عہد کے ہندستان کے مختلف گوشوں کو پیش کر کے مکمل ہندستان کو پیش کر دیا ہے۔ یہاں تک کہ پریم چند کی حقیقت نگاری کے قریب ان کا کوئی ہم عصر ادیب نہیں پہنچ سکا۔ ‘‘(۵)

تنقیدی نقطہ نظر سے پریم چند کا سب سے بڑا کارنامہ یہ ہے کہ انھوں نے اردو افسانے کو محض رومان و جذبات کی تخیلاتی فضا سے نکال کر زندگی کے حقیقی مسائل کی زمین پر کھڑا کیا۔ ان کے کردار عام زندگی سے لیے گئے مگر ان میں داخلی کشمکش، اخلاقی بحران، اور طبقاتی تصادم کے ایسے پہلو نمایاں ہیں جنھوں نے افسانے کو محض تفریح نہیں بل کہ فکری و سماجی اصلاح کا ذریعہ بنا دیا۔ ان کے افسانوں میں کسان، مزدور، عورت، اور محروم طبقے کے مسائل اس شدت سے ابھرے کہ افسانہ ایک عہد کا تاریخی و سماجی دستاویز بن گیا۔

بقول جعفر رضا

پریم چند کا تخلیقی عمل   مختلف  ادوار میں ترقی کے مختلف مدارج سے گزرتا رہا ہے۔ان کی کہانیوں کی ماہیت نامیاتی و حرکی رہی ہے، جن کی نوعیتیں زمان و  مکان کی تبدیلی  اور امکانات و تجربات کے اعتبار سے تبدیل ہوتی رہتی ہیں کیوں کہ کہانی کار اپنے  تخلیقی اظہار کے طریقہ میں نیا پن پیدا کرنے  کی کوشش میں کئی طرح کے تجربات سے دوچار ہوتا رہتا ہے(۶)۔

ان کے ناول ’’گؤدان‘‘ کو اردو و ہندی فکشن کا سنگ میل کہا جا سکتا ہے، کیوں کہ اس میں سماجی ڈھانچے، طبقاتی ناہم واری، اور انسانی المیے کی جامع عکاسی ملتی ہے۔ پریم چند نے عورت کو مظلوم نہیں، باعزت اور خوددار وجود کے طور پر پیش کیا، جو ان کی نسائی شعور کی بلند ترین مثال ہے۔

تنقیدی طور پر اگر دیکھا جائے تو پریم چند کا فن مقصدیت، حقیقت نگاری، اور اخلاقی توازن کا حسین امتزاج ہے۔ انھوں نے نہ صرف ادبی جمالیات کو نئے معنی دیے بل کہ کہانی کو قوم کی اجتماعی روح سے جوڑ دیا۔ ان کے اسلوب میں سادگی، سلاست، اور مکالماتی فطری پن نے زبان کو عوامی سطح پر پہنچایا۔بقول مانک ٹالا

عام طور پر ناول نویسوں ور افسانہ نگاروں نے شہری زندگی کو  اپنا موضوع  رکھا ہے۔ اپنے پلاٹ اسی محور کے گرد چکر کھائے ہوئے رکھے ہیں۔ پریم چند نے اس کے بر خلاف  اصل موضوع دیہاتی زندگی رکھی اور طبقۂ  عوام  کو اپنے ہاں خاص جگہ دی۔(۷)

نتیجتاً، پریم چند کی تخلیقات اردو افسانہ نگاری کی بنیاد اور ترقی دونوں کی نمائندہ ہیں۔ ان کا فن محض ادب نہیں بل کہ عہدِ نو کی اجتماعی شعور کی تاریخ ہے۔ ان کی حقیقت نگاری نے اردو افسانے کو داستان سے حقیقت تک، اور رومان سے انسان تک کا سفر طے کرایا۔ پریم چند صرف ایک ادیب نہیں بلکہ اردو فکشن کے فکری معمار اور سماجی حقیقت کے آئینہ گر ہیں۔