حیدر بخش حیدری کا تعارف،حالاتِ زندگی،تصانیف اور ادبی خدمات

حیدری کی تمام تصانیف و تراجم میں، اردو نثر کے اعتبار سے تو تاکہانی اور آرایش محفل خاصی اہمیت رکھتی ہیں۔ ” تو تا کہانی“ سید محمد قادری کے فارسی ”طوطی نامہ‘‘ کا اردو روپ ہے۔ اس کی ہیئت و تیکنیک وہی ہے جو نخشبی یا قادری کے ’’طوطی نامہ‘‘میں استعمال ہوئی ہے جن میں تو تاہر رات ایک کہانی سناتا ہے۔ اس پر الف لیلیٰ کی تکنیک کا واضح اثر ہے۔ تو تا کہانی میں احمد سلطان نامی ایک دولت مند شخص ہے جس کا کوئی لڑکا نہیں ہے۔ دعاؤں سے لڑکا پیدا ہوتا ہے تو اس کا نام میمون رکھا جاتا ہے اور جب بڑا ہوتا ہے تو ایک حسین و جمیل دوشیزہ سے اس کا عقد کر دیا جاتا ہے۔ ایک دن میمون بازار گیا تو ایک تو تا دیکھا جس کو اس نے ہزار ہن دے کر خرید لیا۔ تو تے کی خاص بات یہ تھی کہ وہ ماضی اور مستقبل کی باتیں زمانہ حال میں بتا سکتا تھا۔ تو تے کی عقل، دانش اور بصیرت کی وجہ سے میمون اسے بہت عزیز رکھتا تھا۔ توتے کی دُسراہت کے لیے اس نے ایک مینا خرید کر توتے کے ساتھ رکھ دی تھی۔ ایک دن میمون نے خجستہ سے کہا کہ وہ سفر پر جارہا ہے۔ اس کے پیچھے وہ جو بھی کام کرے تو تو تے اور مینا سے مشورے کے بعد کرے۔ میمون چلا گیا تو خجستہ اُس کے فراق میں بے چین ہو گئی۔ اس عرصے میں توتا اسے کہانیاں سنا کر دلا سا دیتا رہا۔ اتفاق سے ایک دن خجستہ سیر کے لیے کوٹھے پر گئی تو اور وہاں سے ایک شہزادہ اسے دیکھ کر عاشق ہو گیا اور ایک مکارہ عورت کو اس کے پاس بھیجا۔ خجستہ اُس کے جھانسے میں آگئی اور رات کو اس کے پاس جانے کا فیصلہ کیا۔ سج بن کر جب تیار ہوئی تو مشورے کے لیے مینا کے پاس آئی۔ مینا نے اسے منع کیا تو غصے میں آکر اُس کی گردن مروڑ دی۔ پھر وہ توتے کے پاس گئی۔ تو تا مینا کا انجام دیکھ چکا تھا اس نے اس کی ہاں میں ہاں میں ہاں ملائی اور کہا اگر تیرے وہاں جانے کی بات شوہر کو معلوم ہو بھی گئی تو وہ اسے اس طرح اس کے شوہر سے ملادے گا جیسے فرخ بیگ سوداگر سے اس کی جو رو کو دوبارہ ملادیا تھا۔ خجستہ نے پوچھا کہ وہ کیا بات تھی۔ یہ سوال سن کر تو تے نے سارا قصہ اسے کہ سنایا اور یوں رات گزر گئی اور اس کا جانا موقوف رہا۔ اس طرح وہ ہر رات سج سنور کر توتے کے پاس آتی اور تو تا اس کے پوچھنے پر اسے وہ کہانی سناتا جس کا ذکر اس کی زبان پر آیا تھا لیکن جب کہانی ختم کو جاتی تو صبح ہو جاتی اور خجستہ کا جاناٹل جاتا۔ تو تا اسی طرح ہر رات اسے ایک نیا قصہ سناتا رہا اور ۳۵ ویں رات کہانی ختم ہوئی تو میمون واپس آگیا۔ مینا کا پنجرہ خالی دیکھ کر اس نے پوچھا کہ مینا کہاں گئی۔ ابھی خجستہ کچھ کہنے نہ پائی تھی کہ تو تے نے کہا: ” پیرومر شد ! آپ ادھر تشریف لائیں اور مینا و  خجستہ کا حال مجھ سے پوچھیں۔ مینا کو آپ کی بیگم صاحبہ نے گردن مروڑ کر اپنے یار کے واسطے مار ڈالا اور مجھے بھی مارا چاہتی تھی کہ میں نے آپ کے قدم دیکھے تھے ۔ “ اس بات کو سنتے ہی میمون تاب نہ لا سکا اور ایک ہی وار میں خجستہ کا کام تمام کر دیا۔ اس کے ساتھ تو تا کہانی ختم ہو جاتی ہے ” ۔ سنسکرت میں تو تا کہانی کے مرکزی کردار آخر میں ایک دوسرے سے مفاہمت کر لیتے ہیں اور امن و آشتی سے رہنے سہنے لگتے ہیں۔ یہاں در گذر کو بدل کر نیکی کی فتح اور بدی کی شکست دکھائی گئی ہے۔ ہر محبت جنسی محبت ہے اور ہر کردار دوسرے کو پہلی نظر میں ہی اپنا ہم راز اور محبت کا امانت دار بنالیتا ہے۔ انسان کی بدی کا پہلو بار بار نیکی سے رجوع کرنے پر مجبور ہو جاتا ہے اور بدی ملتی رہتی ہے اور آخر میں نیکی کامیاب ہوتی ہے۔

تخیل کی پرواز کی اس کہانی میں بھی فروانی ہے جس پر ہر نا ممکن بات ممکن ہو جاتی ہے۔ ان باتوں کو اس طرح بیان اور نمایاں کیا جاتا ہے کہ پڑھنے والے کی توجہ اس کے نا ممکن ہونے کے طرف نہیں جاتی۔ پہلے قصے میں تو تا جسے بلی کھا گئی تھی، دوبارہ سامنے آتا ہے تو مالک کے پوچھنے پر بتاتا ہے کہ تم نے چوں کہ اپنی بے گناہ بی بی کو نکال دیا تھا تو حق سبحانہ تعالی نے مردے کو زندہ کر دیا۔ عقیدے کے مطابق اللہ قادر مطلق ہے اور اس پر ہر شخص پورا ایمان رکھتا ہے۔